Krystal
深圳攻略
深圳2026 12大新商場/地標/玩樂好去處🎉
深圳嚟緊2026有超多新景點，全部建築設計都好有心思，真係好期待啊！無論帶小朋友去「樂高樂園」放電，定同朋友去「粉紅大街」打卡，甚至去「海上商場」Chill住睇海都咁正。快啲約埋屋企人同朋友，準備2026年北上大玩特玩，掃盡呢12個必去新好去處啦！
1. 深圳樂高樂園度假區 (LEGOLAND Shenzhen Resort)
佔地面積58.34萬平方米，總投資 69.45 億元！喺大灣區首個國際IP親子主題度假區、深圳首個國際大型文旅 IP 項目，專為 2-12 歲親子家庭打造～ 規劃1個樂高主題樂園、1個樂高水上樂園、3大主題酒店，提供超100 個互動騎乘設施、表演同玩樂景點，更融入咗本土文化元素，親子遊體驗感100分💯！目前，50個主題單體已經順利封頂，3大酒店亦全面推進內部機電安裝，開園倒計時開始！
📍地點：深圳市龍崗區南澳街道大新路56號（深圳市大鵬新區）
🚇交通：建議自駕/Call 車
📅預計開業：2026 年建成（具體時間待官方公佈，目前已啟動開園團隊招募）
2. 深圳灣萬象城·粉紅大街
今次真係少女心爆棚💕新起嘅呢條大街全部都係粉紅色，而且會有40+各色各樣嘅品牌進駐，例如有IIRICE Dirty奶啡、COWCOW希臘乳酪、來自丹麥國際設計品牌嘅HAY同埋Urban Muse 藝術空間等特色店鋪，畀大家嚟chill下😌另外，最重要係！2026年1月1日深圳麥麥藝術館將會正式開幕，係粉紅色嘅M記啊，記住嚟打卡!
📍地點：深圳市南山區科苑南路
🚇交通：地鐵 2/11 號線後海站 G 出口
📅開業：2025年12月30日
3. DM 港隆城
建築面積 ~7萬平方米，寶安西鄉全新商業標杆！由國際團隊 WOODS BAGOT 設計，榮獲中購聯 2024「卓越設計」獎，主打「無界商業」概念，打造立體空間感同埋超強體驗感～ 規劃24小時業態，配套1200-1600 個停車位，商戶類型多元，一站式滿足曬購物、休閒同娛樂嘅需要！
📍地點：深圳市寶安區寶民2路129號
🚇交通：地鐵 12 號線「寶安客運站」D出口
📅預計開業：2026 年中
4. 深圳市羅湖區「一館一中心」
總建築面積7.7萬平方米，羅湖全新文化生活核心！由21層區圖書館、17 層青少年宮及其他配套設施構成，以「書山堆疊」為設計理念，而且融入AI智能分揀、一體化智慧牆及智能採編系統等技術，令新館充滿未來科技感！好適合帶小朋友嚟呢到體驗🧑🧑🧒另外，青少年宮，仲有劇院、運動區域同埋創科空間等地方，好啱大家星期六日嚟玩～
📍地點：深圳市羅湖區怡景路
🚇交通：地鐵站5號線怡景站C出口
📅試運營時間：2026年1月1日起試開放（圖書館暫開 1-3 層、24 小時自助圖書館、智慧圖書分揀區；青少年宮暫開劇場和一樓大廣場）
5. 國貿 SPRING
總建築面積約3萬平方米，坐落喺深圳最繁華嘅商業地帶！地理位置超方便，鄰近羅湖口岸，地鐵直達！ 而且今次改造係用咗約2億去全面升級，目的係建立一個社交科技休閒空間～目前正在招商，好快可以同大家再次見面👋
📍地點： 深圳市羅湖區人民南路
🚇交通： 地鐵 1 號線「國貿站」直達
📅預計開業： 2026 年
6. 小梅沙濱海商業
建築面積約 8.8 萬平方米，鄰近千米沙灘與海洋世界，主打融合「娛樂+度假+購物」3大概念，打造全海景沉浸式體驗～ 匯聚多家特色商戶、海鮮主題餐飲、潮流零售與親子遊樂店，家庭、情侶、朋友聚會都啱晒～
📍地點： 深圳市鹽田區小梅沙
🚇交通： 地鐵 8 號線「小梅沙站」直達
📅預計開業： 一期2025年7月，二期2026年中
7. 騰訊總部園區 - 未來科技城「企鵝島」
總建面突破 300 萬平方米，規劃5大功能街區，集研發、辦公、生活配套、文化休閒於一身！企鵝島嘅公共區域同埋且公寓將會開放畀公眾，畀大家體驗呢個科技感同舒適感滿分嘅園區～
📍地點： 深圳市寶安區緯四路
🚇交通： 11號線然後Call車到騰訊總部園區/ 地鐵15號線(建設中)
📅預計開業： 2025年10月試運，2026年預計全面成型
8. Alival 新體匯 (Alival Sports Hub)
總面積達3.77萬平方米，可以話係大灣區體育愛好者嘅據點啊！ 有齊全球首個開合蓋綜合體育館、國際 A 類專業足球場，全年有100+場國際賽演同灣區賽事，睇波睇演唱會之後可以去埋行街🛍️，超方便！呢到規劃咗5大主題空間，匯集咗運動裝備、潮流互動、合家歡體驗於一身，而其仲有2000+個停車位同冰場，滿足曬運動、社交、休閒需求～
📍地點：福田區笋西路2006號深圳市體育中心
🚇交通：地鐵3號線/7號線「體育中心站」直達
📅預計開業： 2026 年
9. 灣區書城
建築面積達13.1萬平方米，係全國最大嘅書城文化綜合體。而且因為南北兩館對稱，所以被稱為「灣區之眼」👀 佢個外牆都好特別，係傾斜75.27° 嘅超大弧形玻璃幕牆。灣區書城作為深圳「新時代十大文化設施」，這裏不單止有海量書籍可以借閱，仲係其他文化體驗、休閒打卡嘅公共空間，啱晒啲文青同一家大細嚟呢到！
📍地點：深圳市寶安區濱海廣場（鄰近寶安圖書館、濱海藝術中心）
🚇交通： 地鐵5號線「寶安站」A1出口
📅預計開業： 2026年
10. 鷺湖四館
鷺湖四館總建面近13萬平方米，集圖書館、美術館、青少年宮、群眾藝術館於一體！ 建築設計超有格調，白色流線型外觀配巨型玻璃幕牆，光影交錯好啱打卡📸內部空間闊落通透，圖書館有海量藏書同分齡閱讀區，美術館有專業展廳，青少年宮同群藝館仲有豐富課程同活動，無論係大人小朋友，都可以搵到自己鍾意嘅休閒活動😎
📍地點：深圳市龍華區觀湖街道
🚇交通：地鐵4號線「清湖站」B2出口轉有軌電車2路高新區東下車
📅開業：已全面建成並對公眾開放，免費參觀（部分特展除外）
11.深圳市文化館新館 (Shenzhen Cultural Center New Venue)
總建面達 8.33 萬平方米，地上7層+地下2層，集演藝、培訓、展覽、圖書閱覽於一身。擁有1350㎡觀演廣場、240㎡公共舞台同兒童遊樂區等文娛休閒空間。仲有，加設嘅綠色屋面、透水鋪裝同雨水花園，塑造咗一個好舒適嘅環境。
📍地點： 深圳市龍華區民治大道331號
🚇交通： 地鐵5號線「民治站」A出口
📅預計開業：2026年（目前已經順利封頂）
12. 深圳自然博物館
總建面超10萬平方米，地上5層+地下2層，係齊集收藏、展覽、科普教育嘅超大型博物館！屋頂呈流線型，好似山脈起伏咁。而內部就有多個展廳，覆蓋地質演化、生物多樣性、生態環境等領域，仲有互動體驗區同科普劇場，等大家可以邊學邊玩！
📍地點：深圳市坪山區坪山燕子湖片區
🚇交通：地鐵16號線「沙壆站」D出口
📅預計開業：2026年5月（目前已經順利封頂）
圖片&資料來源: 深圳樂高園渡假區、深圳灣萬象城、DM 港隆城、中購聯、執惠、深圳市體育中心、海之傑裝飾工程、深圳市建築工程署、坪山發布 官方小紅書/微博/微信、人民網、深圳市發展和改革委員會、龍華政府在線官網
深圳2026 深圳新景點 深圳新商場 深圳新地標 深圳玩樂攻略 深圳打卡攻略 深圳好去處 攻略
閱讀更多